كله من مرته

موضوع: كله من مرته الأحد سبتمبر 07, 2008 4:31 am

هاي قصة(خرافية طبعا) من كتاب "حكايا الجليل" للمؤلف: جهاد أحمد دكور

الراوي: حاتم خالد عبدالحليم-علما

على ذمة الراوي، والعنب المراوي،والشهيق والنهيق، وحافر الحمار العتيق، وزنبوعة الابريق، والنار والنور، والصاج والتنور.
كان بقديم الزمان ملك عنده بنت ما خلف غيرها. هالبنت كل يوم تقعد ع شرفة هالقصر وتراقب اللي رايح واللي جاي، تشوف فلان هيك وتقول كله من مرته...وتشوف فلان هيك وتقول كله من مرته.
أبوها قاعد عالبرندة و وزيره حده. زه ومل من كلامها، وقال لها: قسمًأ عظمًأ غير أجوزك لأفقر واحد بالمدينة.
قالت: وأنا قبلت بس بشرط.
قال لها: وشو شرطك؟
قالت:بدي بدلة ضابط بتلات نجوم.
خلال ساعة كان كل شي جاهز. حملت هالشنتة وكانوا مستهدين على شب معتر، لا إم ولا أب.
وصلوها لعنده ورجعوا.
هي لابسة بدلة ضابط.
دق الضابط الباب.
فتح الشاب وخجل لأن الغرفة مش قد المقام. الولد اسمه محمد.
قال الضابط: يا محمد، ممكن تقعدني فترة عندك لأني مش ملاقي محل؟ وأنا متلي متلك.
قال له: أهلا وسهلا( وما كان عارف إنها بنت)
راح الضابط عند صاحب شركة وطلب منه إنه يوظف شخص بخصه وأد ما بده يعطيه أجرة.
قال صاحب الشركة: بكره جيبه معك حتى أشوفه.
تاني يوم أخده معاه وفرجاه لصاحب الشركة. شافه مهذب ووسيم. الولد نشيط وصار يشتغل وياخد معاش متل ما تقول 150 دينار.
قال الضابط لمحمد: شو رأيك تاخد خمسين دينار مصروف، وتعطيني الباقي منشان أصمد لك لتعمر بيت وتتجوز؟
صار كل آخر شهر يعطي الضابط مية دينار.
يوم من الأيام راحت قافلة على العراق وطلبوا من محمد يروح معهن.
قال محمد: علي مشورة...وراح شاور الضابط.
قال الضابط: أطلب خمسة آلاف دينار أجرة وإذا اشتغلت إضافي إلك أجرة تانية.
وافق مسؤول القافلة وراح محمد معهن. مشيوا في الصحارى والا لاقوا بير مهجور. بدهن يشربوا ويسقوا الدواب.طلبوا من محمد ينزل عالبير وإله أجرة إضافية.
ربطوا محمد بالحبل ونزلوه حتى وصل نص البير. نهر عليه واحد وقال له وقف عندك!
طلع والا هو مارد.
قال له شوف الروس المقطعة.بدي أسألك..إن جاوبت بتنجى وإن ما جاوبت بقطع راسك متل هالروس اللي قدامك.
قال له: إسأل.
قال له: مين أحلى؟ هاي البنت ولا هاي؟ (ومعه بنتين وحده بيضة متل النهار ووحدةه سودة متل الليل)
قال محمد: حب حبيبك ولو كان عبد أسود.
قال المارد: صدقت...عبي مي.
بعد ما خلص، مد المارد إيده عجيبته وأعطاه محرمة ملفوفة فيها جوهرة قيمة. لمن طلع محمد من البير لاقى قافلة راجعة من العراق. أعطاهن المحرمة يوصلوها للضابط. كانت الناس أمينة بهذاك الوقت.وصلوها للضابط.
فتحت البنت المحرمة وشافت الجوهرة ولا هي بتوج وج!
باعتها بآلاف الدنانير، وراحت عند معماري طلبت منه يعمر لها قصر متل قصر الملك بالضبط.
بعد مدة بسيطة..ولا قصر متل قصر الملك ع شط البحر. سكرت الأوضة ورحلت ع القصر.
رجعت القافلة ورجع محمد على أوضته لاقاها مسكرة.
صار يسأل عن الضابط قالوا له رحل على شط البحر آخر المدينة.ظل يسأل حتى وصل للقصر. تطلع ولا بنت متل القمر قاعدة ع البرندة.بس شافته نادت له وطلع وقعد.
قالت له: عارفني مين أنا؟
قال: لا مش عارف.
قالت له: أنا الضابط. أنا بنت الملك، وأنا يلي وصلتك لهون..وكسبت الشرط من أبوي.
لبس محمد أحسن ملابس، واستقبلوا أبوها وحاشيته أحسن استقبال، وحكت لأبوها شو صار معها.
عبطها وصار يبوس فيها، وبارك الزواج وقال لها: فعلًا كله من مرته!!! Very Happy

موضوع: رد: كله من مرته الأحد سبتمبر 07, 2008 5:42 am

هههههههه
حلوة القصة

يسلموو آية على القصة

^ ^

موضوع: رد: كله من مرته الأحد سبتمبر 07, 2008 10:39 am

تكرم

ولو! ان شاء الله تكون عنجد عجبتك

Admin عدد الرسائل : 211 تاريخ التسجيل : 08/08/2008

يسلمووو
والله شفت المشاركة من الظهر بس ما قرأتا منيح شفتا طويلة Cool

بس طلعت كتييير حلوة
ومرة تانية يسلموووو Very Happy

تحياتي
حـــــــدو

walla l ktab kollo 7elo...w law bYetla3 bi 2eede konet na2alto kollo..

شكرا على القصة

حلوي كتير

ومضحكة

توقييع afro